طريقه لعمل اللبنه (نوع من انواع الجبن) فى المنزل

طريقة عمل اللبنة -- و هى نوع من انواع الجبنة البيتى الجميلة و الصحية و المضمونة من غير مواد حافظة ولا حاجات مش عارفين مصدرها

المقادير
و دى بتبقى حسب الكمية المرغوب فيها انا هاقول على الكمية اللى انا
باعملها لانى باعملها بكمية كبيرة و بتفضل عندى بالشهور بتبقى اريح

المقادير:

1 - 4 كيلو لبن كامل الدسم

2 - لكل كيلو لبن 2 كوب زبادى كامل الدسم يعنى 8 كوب زبادى

3 - ملح حسب الرغبة انا باحسبها كالاتى باضيف لكل كيلو لبن 3 معالق ملح كبيرة ويفضل ملح خشن-- معلقة الاكل

4- زيت زيتون

الطريقة:

نفس طريقة الزبادى وهى كالاتى:

1- نغلى اللبن ثم نرفعه من على النار

2
- ننتظر اللبن يهدى و نعمل اختبار حرارة اللبن بان تضعى اصبعك فى اللبن و
تعدى لغايت 10 ان اتحملتى الحرارة يبقى نضيف الزبادى ان لم تحتملى يبقى
تنتظرى حبة كمان وتعيدى الاختبار

3- نضيف كمية الزبادى كلها و نقلب تقليب بالراحة حتى نتاكد ان كل الزبادى امتزج جيدا جدا مع اللبن

4 - نغطى الللبن كويس و نضعه فى مكان مغلق و نغطيه بأى قماشة نضيفة و نسيبه لتانى يوم نفس التوقيت

5 - تانى يوم نضعه فى التلاجة ليوم اخر

6
- تالت يوم نخرجه من التلاجة و نضيف الملح و نقلب و نحضر كيس قطن -- ممكن
يكون كيس مخدة مش بنستخدمه -- و نضع فيه الزبادى اللى عملناه بايدينا
الحلوين و نسيبه فى اى مكان يصفى ميته تماماااا

7 - انا باسيبه لمدة يوم كامل و برة التلاجة مش ضرورى فى التلاجة عشان يصفى ميته كويس

8 - كده بقى عندنا اطعم لبنة و حاجة بيتى و جميلة اوى

9-
بنحضر برطمان جميل كده و نضيف بلاستيك او زجاج مش بتفرق و بنضع فيه زيت
زيتون و نعمل اللبنة كور بحجم الليمونة و نسقطها فى زيت الزيتون

10
- بنخلص الكمية كلها و نتاكد انها كلها متغطية فى زيت الزيتون كويس و نغلق
البرطمان باحكام و نسيبها لمدة اسبوع بالكتير و ناكل منها بالف هنا و شفا
-- او ممكن تاكلى منها مباشرة بس كل ما بنسيبها فى الزيت بيبقى طعمها خرافة

هتقولولى دى خطوات كتيرة اوى و متعبة هاقولكم بالعكس هو بس الشرح الكتير
بيدى الاحساس ده ولما هتشوفى المنتج من ايديكى و زوجك و اولادك يحبوه و
ينفعك فى ساندويتشات المدرسة و فى الفطار و العشا من غير ما تحتارى مش
هتبطلى تعمليها

طيب
هتقولولى كده هنستخدم زيت زيتون كتير اوى و الميزانية مش هتكفى
هاقولكم معاكم حق كلامكم صح بس فى حاجة مهمة ان كمية الزيت دى انتى
بتستخدميها على طول بعد كده يعنى بتاكل اللبنة و بيفضل الزيت فى البرطمان و
تعملى عليه لبنة تانى و تالت و عاشر يعنى ممكن تشترى زيت الزيتون ده مرة
واحدة كل 6 شهور او اكتر

وبالف هنا و شفا ويارب تعجبكم

فى
كمان صديقاتى بيجيبوا زبادى مضمون اول عن اخر و بيصفوه و يعملوا الخطوات
البسيطة اللى باقية بس مش بيدى نفس الكمية و مش بيبقى بنفس الجودة و
الطعامة بتاعت حاجة البيت