طريقه عمل العيش الصحى فى المنزل

المكونات سهلة و بسيطة و متوفرة

1- دقيق كامل -- يعنى مش الدقيق الابيض المنخول لا الدقيق الكامل اللى
بالردة بتاعته لان الردة دى يا بنات فيها كمية فوائد كبيرة اوى بداية من
انها بتقى من سرطان القولون و مشاكل المعدة و الهضم سلام قولا من رب رحيم
الى انها بتسهل عمل الجهاز الهضمى كله و بتدينا طاقة ومش بتخلينا نزيد فى
الوزن او السكر يرتفع و دى حاجة وصانا بيها الرسول صلى الله عليه و سلم

2- حبة البركة مطحونة بمقدار ربع كوب لكل كيلو دقيق-- او الحبة السودا و
طبعا كلنا عارفين حديث رسول الله صلى الله عليه و سلم فى حبة البركة حينما
قال انها شفاء من كل داء الا الموت

3- خميرة جافة او العادية بتاعتنا

4 - نص معلقة صغيرة ملح

5 - 3 معالق كبيرة سكر

6- زيت ذرة او زيتون -- لكل كيلو دقيق نصف كوب زيت

7- بذرة كتان مطحونة -- و دى يا بنات اختيارى يعنى لو مش متوفرة خلاص لكن
متوفرة خير و بركة و هتخلى عيشنا صحى اكتر لان بذرة الكتان فيها دهون
الاوميجا ثرى اللى بتحمى من امراض القلب و بتدى نشاط للجسم و بتقلل
الكوليسترول

7- ماء فاتر للعجين

هنخلط المقادير الجافة كلها مع بعض كويس الدقيق مع حبة البركة المطحونة مع الخميرة مع الملح مع السكر

ثم بعدها نضيف ماء العجن و نعجن كويس اوى زى اى طريقة لاى عيش بنعمله الى ان يتشكل عندنا عجينة متماسكة الى حد ما و هنعرف دلوقتى ليه

فى اخر خطوة خالص هنضيف مقدار الزيت و نعجن كويس اوى ونسيب العجينة ساعة
تخمر و بعد كده نشكلها حسب الرغبة و نسخن الفرن قبلها و نخبز العيش و بالف
هنا و شفا