سيستم الألفطة...للرجالة المتظبطة

:القاء السلام:

فقد تفتق نافوخى عن سيستم جديد هاحكلكوا عليه .. و سميته" سيستم الألفطة للرجالة المتظبطة" ..
يعنى سيستم عنب هنريح و نستريح ..
فقد استنفذنا الكثير من الكهرباء فى السساتم التقليدية زى أسلوب : القفة أم ودنين و أسلوب أطبخى ياجارية .. حتى أسلوب" إلهى و انت جاهى ماترجع" و" داهية تشيل الأبعد" .. و فى النهاية برضك لا بيتعدلوا ولا بطيخ ..
فككوا بقى يا أخوات من الحوارات التراديشيونال دى و هيا بنا نلعب:الرجل مهما كان مركزه أو طول شنباته .. فيوجد بداخله طفل (مش بالمعنى اللفظى طبعا.. ركزوا معايا و مش عايزين هطل) لآ و طفل عربيد كمان .. طفل بمعنى انه بينضحك عليه .. أيوه همّا بيحبوا كده مش زيّنا نحقق و ندقق و ندوس عالميت لحد مايهوّى
همّا أطيب مننا : كلمة فضحكة فحدوتة قبل النوم و حدوتة بعد المعرفش ايه .. و خلاص بقى فجيبك
طيب ايه اللى بيمنعنا من ممارسة الأسلوب ده عادةً ؟
اسمالله عليكوا بنبقى مش طايقين شكله و لسان الحال بيقول مايستهلش ده مايل و ايه يعدله.. صح؟؟
لأ يا قطط .. منظور جديد .. فكر جديد .. رؤية أفضل للمستقبل .. فكوا الكرافتات
هننام مغنطيسياً كل واحدة فينا هتسرح شوية فى بعض الأشياء : الطلاق .. نظرة المجتمع المتدنية للمطلقة .. و حتى لو رفسنا نظرة المجتمع فى ظل السموات المفتوحة فرصة الجواز مرة تانية و فى أيدك عيلين تلاتة بعيدة شويتين ..
ولو قلتى مش مهم جواز تانى فالوِحدة مُّرّة ياصاحبى و الحياة ناشفة و عايزة ونس .. برضه الأولاد محتاجين سورى أب يحميهم و يشكمهم فى ظل العولمة و غفلة شرطة المخدرات و الآداب العامة ..
صدقينى لو رحلتى هتفرحيلك كام يوم و بعدين هتجيلك شوية أمراض نفسية أبسطها انفريوريتى كومبلكس .. هلاوس سمعية ..حنين للنكد .. شروخ فى الزور من هت العيال ..طيب .. تعالوا ناخدها تحدى و نرفع شعار :" ياللى اديت لحياتى فحبك طعم و ريحة .. مش هتنازل عنك أبدا دانا تلقيحة"

أولا: شحن نفسى مستمر .. طول مانتى فى البيت فى الشارع فى الشغل : أبو عيلاء ده سيد الرجالة – أبو عيلاء ده فل الفل – أبو عيلاء ده سبعى – أبو عيلاء ده جملى ..هو فيه زى أبو اللوووول و هكذا حتى تصدقى كل الحوارات دى.

ثانيا: تغاضى تماما عن ريحة شراباته .. لون غياراته .. شخيره بالليل .. حسه الكوميدى المتدنى .. صوته العالى .. مامته .. اخواته الحيزبونات .. نسيانه لجميع المناسبات المفرحة .. طريقة أكله .. ولا كأنك شايفه حاجة : انتى ست فى مهمة قومية و يجب أن تضحى يا بتعة.. من أجل كرامة المرأة .. من أجل أبنائى .. و فوق ذلك كله : من أجل مصر (مع تحيات الحزب).

ثالثا: شوية تنازل بقى يا بيضه عن بعض الحقوق : مانتى كده كده متنازلة و ان جالك الغصب خدوا بالرضا : استخدمى بعض الألفاظ الجديدة : مفيش مشكلة يا حبيبى – أنت تعبان و شقيان مالصبح ربنا يكون فى عونك .. بطلى مصمصة و قلبة وش و نعى فبختك و بلاش سيرة الناس اللى خيبتهم السبت و الحد – خللى خيبتك اتنين و خميس مع الحلاقين يا أوكّة.. لأ بجد ماتقفيش عالواحدة و كبرّى كبرّرّرّى بلاش أتامة و انسى دور أم الغضب و اهو يكفيه شرف المحاولة.

رابعا: روحى للمزيّن يا بتعة ..سياسة التجديد هى سياسة المرحلة : بصى عالأوكش بتوع الكليبات و اتعلمى .. فورشه كده و فورشه كده مش عيب .. و ابقى خنصرى تمن الليالى دى من المصروف – عادى يعنى و عليّا الفتوى دى – حقيقى أبو عيلاء هينبهر و هيشوفك أوزى حتى أسألى خالتك بهانة.

خامسا: أول الشهر .. دخول المدارس .. الأعياد .. المصايف .. و مثل هذه المناسبات المكلفة – بلاش بواخة و إلحاح و همز و لمز .. بصى السيناريو ده : أبو عيلاء .. عامل ايه ( أوعى تتكلمى زى اللمبى لتضيعينا) .. حبيبى.. روح قلبى .. نور عينى .. الجمعة الجاية فرح بنت أخوك .. وطبعا لازم أشرفك .. أمّال ايه مش أنا حرم أبو عيلاء .. أحلى راجل .. أجمل راجل.. ( تقمصى دور الصحف القومية ) ولازم أدخل مأنجة دراعك كده و انت فخور بيّا .. و حياتك يابو لولو انا شفت فستان حلو قوى يليق بمراتك حبيبتك بأربع تلاف جنيه .. أنا عارفة انو غالى بس أنا ليّا مين يعنى غيرك و لو مرات أبو عيلاء مالبستش الغالى مين يعنى هيلبس؟ أترك لكِ الأجابة على اس ام اس : مين اللى هيلبس؟

سادسا: انزلى من على ودانه شوية فى أمور الصيانة المنزلية و عوأ العيال و متبقيش من الكفار .. يعنى غير طبيعى كل ليلة تستقبليه بالموشح الأسرى اياه : بقولك ايه .. الأنبوبة خلصت و السيفون بيشر و الإريال اتعوج و السرير بيزيأ و الواد طردوه مالمدرسة و البت بتغيب بالليل .. ماهو لازم يفرقع .. و النعمة لو لقى متوى تانى ليدعك الفانوس و يسيبهالك مخضرة .. و استعملى طريقة لطيفة لطلباتك .. و كثير من المقدمات .. بلاش ضغط عالافندى .. و خليكى خفيفة ياااااابتعة

سابعا: تابعى معاه مشاكله – حسى بيه – و اديله اهتمام و انتى بتسمعى يعنى لاتتاوبى ولا تعلّى التليفزيون ولا تسفهى من كلامه .. حسسيه انك بالروح بالدم نفديك يابوعيلاء .. و ياريت لو تنحازى لآراؤه شوية و تثنى على سعة أفقه و بعد نظره و فكره الثاقب (مش عيب .. رؤساء تحرير و بيقولوا كده .. هم أحسن منك؟) .

ثامنا : و أخيرا .. شوية حنيه يا بتعتع.. الرجاله بييجوا عالحنّية .. أنترى فوسط كلامك مصطلحات حنينة : ألف سلامة يا عنيّا .. هتوحشنى .. ان شالله أنا ياقلبى .. ياستى تخيلى انه الولا عيلاء ابنك ثم تعاملى مع الهدف ..و ادينا بنجرب ..
ورانا إيه ..
ورانا إيه ..
ماشى يا ستات ..
نلتزم بالخطه ..
نطول بالنا ..
فى الأول ممكن مايبقاش فيه نتايج سريعة و هيبقى فيه جس نبض من الطرف الآخر ولازم نعرف ان دى خطه طويلة المدى ...
على بركة الله.......
هجووووووووووووووووووووووم

» عظمة على عظمة ياست" للرجالة اللى عايزين يتجوزوا "زوجة تانية

سجل فى : 03/06/2011

ممكن آخذ من وقتكم ثوانٍ

ممكن تقولي
سبحان الله وبحمده سبحان الله العظيم
قلتيها ؟?
طيب عارفه حصل إيه لما قولتيها ..!!؟؟؟
بالجملة اللي قلتيها زرعت لك نخلة بالجنة
بالله عليكي في أسهل من كده !!!
أنت عارفه أن نخل الجنة مش أي نخل
جذعها من ذهب..
عارف أنك لو أرسلتي الرسالة دي أو نقلتيها لجروب آخر
هيحصل إيه ؟؟؟
كل واحد قالها أنزرع لك أنتي و هو نخلة بالجنة
مش هتخسري حاجه لو قلتيها و نقلتيه

سيستم الألفطة...للرجالة المتظبطة

مواضيع مماثلة

مواضيع مماثلة

ردود موضوع : سيستم الألفطة...للرجالة المتظبطة

سيستم الألفطة...للرجالة المتظبطة