| | 
امكن مؤخرا لست البيت اللهلوبة ان تجعل كيلو اللحمة في ايدها زي الاستك بيتمط والكيلو يبقى اتنين وتلاتة وربنا يبارك عن طريق اتباع احد الاختيارات التالية :
كفتة اللحم بالبطاطس
قشري كيلو بطاطس واسلقيه واهرسيه وعصجي كيلو اللحمة المفرومة ب3 بصلات كبار وفصين توم وملح وفلفل وبهار وبقدونس (اختياري ) واخلطيهم مع بعض كويس وصبعيه ودخليه التلاجة شوية الاول وبعدين سويه في الفرن
كفتة اللحم بالخبز والبيض
هاتي اي عيش ناشف بايت عندك (فينو او بلدي )يكون كمية حلوة كسريه صغير وانقعيه في شوية لبن وبعدين اعصريه اوصفيه واخلطيه مع اللحم المفروم والبصل والبهارات و3 بيضات بلدي او2 كبار واعجني كويس وحطيه في قالب كيك وسويه في الفرن وبعدين قطعيه ترانشات او صبعيه كفتة او افرشيه في صنية ودخليه الفرن وقرب السوا رشي عالوش حبنة مبشورة
الكفتة السقاري
هاتي نص كيلو برغل وانقعيه من بليل لحد مايطرى واغسليه 150مرة عشان ينضف وبعدين اضربيه في الكبة
واعجنيه كويس مع اللحمة المفرومة والبصل والتوابل وصبعيه علىايد معلقة خشب ورصيه فيصنية في الفرن وحطيله فحمة
كفتة اللحم بالصويا
دي اكيد حفظناها خلاص هنجيب نص كيلو فول صويا مجروش ومبهر من العطار ونحط عليه مية تغطيه وننقعه 10دقايق لحد مايطرى وبعدين نصفيه من المية كويس ونضيفه للحمة والبصل والتوابل ونعجن كويس ونصبعه كفتة
الشاورمة
كيلو لحم يقطع ترانشات رفيعة وبعدين بالمقص تعمليها جزل رفيعة (زي الكبدة الاسكندراني ) وتنقعيها في تتبيلة من بلليل (نص كوب توم مفروم وملح وفلفل وبهار وخل )والصبح سويها عالنار وقسميها في اكياس في الفريزر وعند اللستخدام قطعي بصلة حلقات وفلفل حلقات(كتير) وشوحيهم عالنار وضيفي كيس اللحم وفي الاخر طماطم مكعبات وكام رغيف فينو اوبلدي وسلطة طحينة الكيلو بيعمل 8 اكياس
اللحم بالخضار
في الحالة دي هنسلق اللحمة عادي بس بعد مانقطعها مكعبات صغيرة ونشيلها في اكياس في الفريزر وبعد ما تطبخي خضارك عادي (بسلة بجزر ,كوسة ,لوبيا بامية فاصوليا ملوخية.........) حطي كيس اللحمة في اللا خر وخليها تاخد غلوة مع الخضار وبعدين اغرفي لكل واحد في طبقه
كفتة الرز
طبعاكلنا عارفينها رز مطحون +بصل وتوم مفروم +ملح وفلفل وبهار +خضرة مفرومة +اللحمة المفرومة اعجني وصبعي وارمي في الفريزر ودي بقة بتفرط جدا وعند التسوية هتعملي طماطم مسبكة ببصلة وتسويها فيها او تسويها عالبخار وتحمريها
الكفتة الاسكتلندي
تعصجي اللحمة المفرومة ني في ني ببصل وفص توم وملح وفلفل وبهار وتاخدي جزء منها وتكوني سالقة 6 او 7 بيضات تغطي البيضة بالدقيق وبعدين غلفيها باللحمة كويس زي الكورة وحطيها في التلاجة نص ساعة وبعدين غطيها دقيق تاني وحمريها في زيت مقدوح كويس ولما تبرد قطعيها ترانشات
الكفتة بالبقسماط
دي سهلة تجيبي اللحم المفروم وعليها 2 كوب بقسماط ناعم و3 بصلات مبشورين ومعصورين وفصين توم وملح وفلفل وقرفة او بهار و ربطة بقدونس مغسولة ومفرومة ومتصفية واعجني وصبعي كفتة وحطيلها فحمة في نص الصنية
اللحمة العصاج للحشو
ودي لحشو الجلاش والسمبوسة والرقاق واصناف الباشميل (المكرونة والمسقعة والكوسة وو,,,,,,,)
بردة هتنقعي نص كيلو فول صويا وتصفيه وتقطعي بصل كتييييييييييير مكبات حوالي 6 بصلات كبار وتحمريهم في الزيت وبعدين تضيفي اللحمة المفرومة والصويا والتوابل والملح وتقلبي كويس وتضيفي مية لحد ماتستوي وقسميها في اكياس وعالفريزر وعند الاستخدام في الحشو قطعي على وشها ترانشات فلفل اخضر وترانشات جزر رفيع
يارب تعجبكو اوعوا تنسوا تغسلوا اديكو وتسمو الله قبل الاكل وتاكلو بنفس راضية وتحمدوا الله على النعمة عشان يبارك فيها ويحفظها من الزوال
| {.... توقيع بحر الحنين ....} | |
|
|
الرئيسية
