[b]الجزء الاول:تقشير وصنفرة الايدينديه خطوة مهمة جدا عشان ايديكي تبان دايما ناعمة
وتخلصي من الجلد الميت اللي بيتكون فيهم بسبب بقي شغل البيت شوية و ضرب
العيال شويتين و الاشغال المكتبية و طبعا التكتكة علي الكي بورد في كتابة
مشاركاتك في فتكات.المستحضر اللي انا بسميه المستحضر السحري بقي
لتقشير الايدين وبعمله بنفسي في البيت من غير ما احتاج اشتريه وهو
زي اسكراب اورفليم للايدين بالظبط واحسن وارخص بكتير
ترطيب وبياض و نعومة وهتحسي ايدك فعلا شباب باذن الله وما تنسيش تدعي لي من فضلك والكمية اكتر تقريبا تلات مرات.
تكلفته الكلية:حوالي 12 جنيه لكمية تكفي تقريبا شهرين او علي الاقل شهر ونص مع الاستعمال اليوميبيتكون من الاتي جهزي وتعالي معاي:
1- كيس ملح الحليب يوكو سبا (بأي عطر او لون
ابيض في اسود بمبي موف اخضر اي حاجة) من اي صيدلية او محل ادوات تجميل
وسعره بين 8.5 - 10 جنيه مصري.
[/b]
- زيت لوز حلو من عطار كويس او من شركة الكابتن مش عارفة السعر بالظبط كام ولكن اخر مرة اشتريته كان بسبعة جنيه تقريبا لل 50 مل.
3- سكر ابيض حوالي معلقتين (وياريت لو سكر التموين اللي بيتصرف ببطاقة التموين الذكية لان حبته خشنة قوي تعمل معانا شغل جامد).
4- جلسرين نقي عاوزين حبة صغيرة تقريبا معلقتين
بس هنجيب زجاجة كاملة تقريبا 100 مل وديه سعرها حسب مانا فاكرة 4 جنيه مصري
فقط لا غير.
الطريقة:
هناخد تلت كيس ملح الحليب مع معلقتين السكر وال 50 مل
من زيت اللوز الحلو ومعلقتين الجلسرين و نخلطهم كويس جدا جدا ونحطهم في
علبة نضيفة وناشفة ولازم نغطيها.
الخليط لازم يكون محبب يعني تحسي بحبوب الملح والسكر مايبقاش سايح فاهمين
قصدي والكميات المذكورة بتخليه زي ما بقول لكم كده باذن الله.
الاستعمال:
يوميا مرة واحدة باذن الله.
وبايديك تختاري الميعاد بقي
قبل النوم.
بعد الاشغال الشاقة الموبدة في المطبخ.
علي حسب ما تلاقي وقت مناسب ولكن المفضل هو قبل النوم.
الجزء الثاني:
ترطيب الايدين
عندنا في الجزء ده اختيارين او طريقتين
1- الترطيب المستمر عمال علي بطال يعني
تكلفته:
حوالي 5-3 جنيه والكمية تكفي تقريبا اسبوع او عشر ايام مع الاستعمال المتكرر.
تركيبه وطريقة عمله:
وده هيكون عبارة عن
باقي زجاجة الجلسرين اللي جبناها مع ليمونتين و تلات معالق ميه ورد و جرام من اي زيت عطري للفواكه من عند بتوع العطور بالجرام.
اخلطيهم وحطيهم في زجاجة نضيفة وحطيها قدام عينك
في المطبخ بعد ما تخلصي شغل المطبخ كده افركي ايديك بشوية من الخليط ده
واعلمي بين الصوابع وعند العقل وكل حتة وافضلي ادعكي لحد ما كل الجلد
يشربه.
2- الترطيب الخصوصي
وده قبل النوم عشان ما تستعمليش ايديكي كتير ساعتها فتفضل محتفظة بالترطيب اطول فترة ممكن.
تكلفته:
حوالي 10-8 جنيه حسب حجم عبوة الفازلين اللي هتجبيه.
طريقته:
1- فازلين طبي عبوة اي حجم سعرها من اول 1.5- 8 جنيه.
2-انبوبة كريم بانثينول ب 2.5 من اي صيدليه.
3- شريط كبسولات فيتامين ايVitamin e سعره مش فاكرة كام بصراحة بس تقريبا 5 جنيه واعذروني لو الزهايمر نساني.
الطريقة:
علي عبوة الفازلين ال 100 جرام نفتح شريط واحد من كبسولات فيتامين اي و انبوبة واحدة من كريم البانثينول ونخلطهم كويس جدا جدا.
ويستعمل مرة واحدة بس قبل النوم وبعد الصنفرة بالمستحضر اللي عملناه فوق ويتعمل بيه بين الصوابع وعند العقل كويس.
الجزء الثالث:
التخلص من الجلد الميت حول الاظافر
الطريقة:
ندفي زيت زيتون معلقة واحدة وندهنه بشكل كويس جدا
حوالين الضوافر وندعكم كويس جدا ونسيبه تقريبا ربع ساعة وبالاداة ديه
(العود الخشب اللي في الصورة) نشيل الجلد الميت بحنيه مش بعنف وبعدين نرطب
كويس جدا.
بعد شغل المطبخ يوميا لازم تدعكيهم بقشرة الليمونة عشان لونهم يبقي ابيض.
وقبل النوم هاتي فرشاة مانكير قديمة وادهني بيها زيت الخروع علي ضوافرك باذن الله هتطول وتبقي قوية بسرعة.
اخيرا تعطير الايدين:
ماهي اكيد الايدين لها نفس انها تتعطر زي باقي الجسم
ومحدش يقولي ملهاش لزمة
و الا ياسلام عليكي كده لو بعد اكلة محترمة وابو العيال عاوز يقولك 
تسلم الايادي ويطبع قبلة رقيقة حونينة علي كف ايديكي
يقوم
هوب يشم ريحة بصل وتوم وسمك وجمبري و حاجات حلوة
متهيا لي هيقول من ايد ما نمسكهاش
ويقولك تسلم ايديكي ويختار انه يربت عليهم بحونان من بعيد لبعيد
.
الطريقة:
بعد شغل المطبخ وتقطيع البصل ومشتقاته
ممكن تجيبي الصابونة الاستنلس ديه وتفركي ايدك بيه
او للتوفير ممكن تستعملي المعلقة الاستنلس العادية بتاعتة الاكل وتفركي ايدك بيها وش وضهر وبين الصوابع كويس.
وبعدين شوية ملح حلوين كده(الملح بيمص الروايح علي فكرة جدا وخاصة روايح التوم والبصل) علي الناشف وتدعكي ايدك بيهم كويس جدا وتشطفيها بالميه في النهاية.
وعشان نعطر بقي اوعي تنسي هتدهني خليط الجلسرين وميه
الورد والليمون والزيت العطري واتفرجي علي الريحة عاملة ازاي بقي ما
اقولكيش هتخلي ابو العيال يلتهم ايديكي مش يطبع قبلة رقيقة بس 
الرئيسية
