من سنتين : 3 سنين أو 3 ونص كده
دى مرحلة بيقولوا عليها المراهقه المبكرة .
والمرحلة دى بتزيد فيها العِند أواى أوى.
وكمان الطفل بيكون فاهم اكتر واكتر وبيكون اسهل فى استيعاب أى أوامر منك .
والأم ما بتبقاش عارفه تعمل ايه مع عِنده ده .
دورك ايه ؟
1- هو محتاج يتعلم رياضه على سن سنتين ونص لحد 3 سنوات.
ده أفضل سن لتعلم الجمباز .
قريت عن مدربة بتقول الطفل اللى مش متاح يلعب جمباز وبعيد عن النادى ،
ممكن تعلميه فى البيت وتعليمك بيكون عن طريق إنه ينط على السرير من هنا لهنا ..
وتخليه يجرى .
يعنى ممارسة الطفل للحركات دى واللى بنقول عليها شقاوة هما بينصحوا بيها عشان تليين عضلاته .
كأن ربنا خلق الطفل بطبيعه فطرية جميله واحنا اللى بنوقف ده فيه وبننفر من كل شقاوته.
2- محتاج تكثفى العمليه التعليميه له .
هاتى كتب اكتر للفواكه والحيوانات وعرفيه المسميات وجسم الإنسان .
شاورى على اعضاء جسمه وخليه يعرفها وينطقها .
خليه يمسك القلم (ده ممكن من سن سنه على فكرة ،مجرد شخبطة تحت اشرافك افضل ما يعمل حاجه من وراكى)
ارسمى دايره وعرفيه إنها دايره ..كررى الرسمة وساعديه يرسمها .
اعملى كده مع بقيت الأشكال الهندسية البسيطة ..
بعد كده ارسمى الشكل وخليه يقولوه او خليه يوصل كل شكل بالتانى .
وانتو عارفين (النفس إن لم تشغلها بالطاعه شغلتك بالمعصيه )
الحواديت المصورة اللى فيها عقدة بسيطة مفيدة جدا لسن ال3 سنوات وفوق.
3- حورى الأمر .
يعنى هو عنيد .بدال ما تقولى هات الطاقيه ،قولى له اوعى تجيبها انا اللى هاجيبها ..مش عاوزاك تجيبها..
وهكذا ..
4-تجنبى تعندى انتى معاه وتزودى عنده .
يعنى لو عارفه إنه هايعند معاكى فى الأكل مثلا ، تجاهليه ، وزينى الأكل وحطيه له .
وحطى لنفسك طبق زيه وقولى (بصوت طفولى ) :
أنا هاكل الأول ...هاسبقك ..أوعى تاكل عشان انا عاوزة اكبر واكون كبييييييييييييرة ..
5- العقاب والثواب فى الفترة دى مهم جدا .
بس ابدأى بالثواب والتعزيز الإيجابى .
كلنا دايما بندور على وسائل العقاب عشان نقمع رغبات الطفل .
وده بييخلى شخصية طفلك مهزوزة وفاقد الثقه فى نفسه.
ابدأى بالمكافأه عن طريق :
1- ابتسمى بوشك له ..واضحكى لو عمل حاجه حلوة .
طب هايعمل حاجه صح ازاى .
مثلا انتى عاوزاه يلم مكعباته ..
قولى له : اوعى تلم مكعباتك ..أنا هالمها الأول ..أنا هاكون شاطرة هييييييييييه ..
اوعى تلمها أنا عاوزة اكون اشطر منك ..
هاتلاقيه يسابقك ويقولك :لاااااااااء أنا هالمها بأه . هاه.
اثناء ما يلمها :قولى استنى استنى ،انا عاوزة الم اكتر ..
**وبعد ما يخلص قولى :هيييييييييييييييييييييه ....لمينا اللعب كلها ..( مكافأه بالكلام-تعزيز لفظى يعنى )
**نسقف بأه ل(مودى مثلا ) سقفه كبيييييييييرة .(تعزيز فعلى )
وكل مرة تيجى تعملى حاجه ،قولى مين هانسقف له سقفه كبيرة أنا ولا مودى .؟؟
**حتى لو بتناديه باسم دلعه ،ده فى حد ذاته بيشجعه يسمع كلامك .
وهكذا .
من 3 سنين لحد 4 سنوات :
1-خيال الطفل بيبدأ ينمو فى المرحله دي .
دورك هنا :
ممكن تستعينى بالحواديت المصورة وتحكى كتير ،وتخليه هو بطل الحكايه او تستبدليه بأى حيوان لفت نظره .
دايما الأولاد بيلفت نظرهم الأسد وممكن (الحمار الوحشي ) لو شبهتيه بملابس مثلا كان بيلبسها مخططه زى الحمار الوحشي .
2-نفس الكلام تقريبا ،لأن مرحلة العند لسه ما نتهتش .
3- التقليد ..بيقلدك أو بيقلد باباه او الناس اللى حواليه .
دورك تكونى قدوة حسنه ليه .
وتحاولى تبعديه عن أى حد يخليه يعمل حاجه غلط.
ولو عمل اصبرى عليه ووجهيه وامنعيه من الحد ده كعقاب لإبنك لحد ما يبطل.
العقاب ممكن تعمليه كالآتى :
--- بتحاولى توجهى كتير وتستخدمى تعبيرات وشك الزعلانه كعقاب .
الوش الزعلان له أشكال كتيرة زى كدهمتنرفزة و على اخري
وزى كدهغضبانة جدا
ابدأى بالأقل ..خليكى ذكيه .
---ممكن تبعدى عنه فى غرفتك لمدة دقيقتين او 3 كعقاب .
3- لما يغلط .. خدى نفس طويل قبل ما تصرخى وخبى وشك عنه ..
واهدى شوية وقولى : ليه بتعمل كده ؟
اعرفى مبرر غلطه قبل ما تعاقبيه .
يمكن لو عرفتى مبرره تلتمسي له عذر .
يعنى مثلا شافك مرة بتمسحى الإزاز . راح جاب ميه وكبها على كل إزاز عندك فى البيت .
طبعا وقت الغلط ما بتفتكريش تسأليه ولا بتفتكرى إنه عاوز يقلدك أو يساعدك بتصرفه ده ولا لاء .
بتفتكرى بس توجهى له كل كلام بيدل على إنه ولد وحش ومخرب .
وبالتالى دى إشارات سلبيه بتوجهيها لعقله الباطن اللى بيخليه ياخد انطباع عن نفسه إنه فعلا ولد مخرب مش مساعد لأمه.
** الأطفال بيغلطوا كتير ..ده طبيعى .
وقت غلطهم بنحس باحاسيس سلبيه كتير وممكن نكره العيال وخلفتها واللى بيخلفوها .
بس لازم تفتكرى انهم نعمه كبيرة وتاخدى نفس وتقولى لنفسك :
أكيد بعد ما بتخلص المشكلة هاستمتع مع ابنى كتير باللعب والتعليم .
انزلى مستوى ابنك واعرفى ليه بيعمل كده .
وفهميه : لو عاوز تمسح الإزاز قول لماما ،وانا هاعطيك قماشه واخليك تساعدنى يا حبيبى .
وخلاص خلصت الحكايه على كده.
وقت الغلط مطلوب منك الآتى :
1- خدى نفس طويل .
2- ابعدى بوشك عن ابنك ،ماتحاوليش تظهرى أى تعبير غاضب إلا لما تعرفى ليه عمل كده.
3- اسأليه عملت كده ليه ؟
ممكن ما يعرفش يجاوبك ، اديه الإحتمال اللى ينمى من تصرفه الجيد وقولى مثلا (فى مثال الإزاز ) :
يمكن انت كنت عاوز تساعد ماما وتنظف الإزاز كله ؟
4- حطى قواعد لتحسين التصرف .
قولى : لو حبيت تساعد ماما يا ريت تقولى عشان اعرفك كويس تساعدنى ازاى .
5- فهميه إن الطريقه اللى ساعدك بيها كانت غلط .(كل ده وانتى فى مستوى جسمه ،يعنى كلامك ليه بعد ما تنزلى شوية لمستواه )
قولى : انا اتضايقت جدا من التصرف ده ،وكشري شوية ، لكن لما عرفت إنك عاوز تساعدنى وإنك ماقصدتش تزعلنى انبسطت منك
وقلت (أكيد المرة الجاية مودى حبيبى هايقولى يعمل ايه عشان يساعدنى صح ).
يا ريت نحاول نفهم ولادنا ونقدر آدميتهم ونحترمهم .
من 4 سنوات لحد 5 سنوات .وحتى 6 سنوات .
مهارات الطفل فى السن ده بتكون اتطورت اوى :
الطفل هنا بيعرف يمسك القلم .
بيعرف يلبس بنطلونه ويقلعه عادى وبيعرف يلبس التيشرت بتاعه
وممكن يقلعه كمان عادى .وممكن يساعدك ويطبق هدومه بطريقه مش منظمة اوى بس ممكن تعلميه.
ممكن يمسك المقشه او المكنسة ويكنس عادى . ممكن يمسك فوطة ويمسح . ممكن يشد ملاية سريره ويروقه.
ممكن يطبق بطنيته لو صغيرة مثلا .
خلاص هو بياكل لوحده من سن 3 سنوات تقريبا .
وبيغسل ايده لوحده من سن 3 سنوات بردة .( ممكن تحطى كرسي وهو يقف عليه وتعلميه يغسل ايده لوحده)
وبيعرف يغسل اسنانه لوحده ( من سن 3 سنوات بتعلميه ازاى يمسكها ويقلدك فيها وتتسابقى معاه على مين هايغسل الأول )
وبيتعلم الحروف والأرقام بصورة اسهل وبيتعلم مسميات انجليش اسهل .
وبيكون اسهل فى التعامل عن سن 3 سنوات وبيسمع الكلام افضل شوية ، بس كل ده بإنك تسابقيه وتقولى :
(هاغمض عينى ،،مين هايجيب الشوز بتاعه مثلا )
وسهل تعملى جدول لتعديل السلوك وتتفقى معاه وتديه نجوم او استيكرات .
وسهل تتفقى معاه قبل ما تخرجوا على حاجه معينه (زى مثلا انا خارجه اجيب طلب وجايه ،ماتطلبش غير حاجه واحده بس؛
ولو زودت مش هاتيجى معايا المرة التانيه .(
والسن ده، سن الأسئله ..
لسه خيال الطفل معاه وبينمو اوى .
دورك :
ممكن تلاقيه ماسك عربيته -او البنت ماسكة عروستها- وعمال يتكلم معاها ..
لو جيتى قطعتى خياله ،ممكن يتضايق ومش عاوزك تدخلى معاه .
سيبيه براحته ، واسمعى شوفي بيقول ايه لعربيته .
بس اوعى تتمادى معاه فى خياله لأحسن كل شيء بيزيد عن حده بيتقلب لضده .
ممكن تخليه يحكى لك حدوتة ، وتساعديه فى أحداثها ( وده من سن 3 سنوات كمان )
ولأن خيال الطفل بيوسع معاه ، تلاقيه يسألك عن كل حاجه .
ماما أن جيت جوا بطنك ازاى ؟
اسأليه وقتها وشوفى خياله واصل لفين : انت ايه رأيك ، تفتكر دخلت جوا بطنى ازاى ؟
عرفيه ربنا ، سهل اوى يتعرف عليه عن طريق خياله .عرفيه إن ربنا هو اللى حطك جوا بطنى زى ما بيحط بذور البطيخ
جو البطيخه من غير ما تتكسر .
العلاقه الزوجيه ، لازم يعرفها إنها مجرد حب بينك انتى وزوجك ، والحضن ده او القبلات دى بتخلى ربنا يرزقنا بنونو صغير.
خليه يتفكر معاكى فى السما والأرض . حببيه فى ربنا من خلال الجنه ..شوفى هو بيحب ايه،
وقولى له :دى موجودة فى الجنه .
وعرفيه إن ربنا عنده النار .. بس هو مابيدخلش فيها غير الناس الوحشه بس.
ماتقعديش تخوفيه من نار ربنا كتير فى السن ده ..لأنك كده بتزرعى بس الخوف اللى بيؤدى لكره الإله اللى بيعذب بس وما بيكافأش.
الأسئلة :
الطفل بيسأل من سن 3 سنوات وممكن يتأخر لحد سن 5 سنوات .
لو ما سألش اسأليه انتى وثيرى عنده حب المعرفه .
هاتى موسوعات حيوانات ونباتات وجسم الإنسان واتعلمى وعلميه معاكى بطريقه بسيطة يفهمها هو .
سيبيه مع الصور وخلي عقله يشتغل ..أحيانا الطفل يشوف الصورة ..تلفت انتباهه ..يسألك .
ماتحاوليش انتى تديه محاضرة ، لأنه هايزهأ طبعا ..لاء اقعدى معاه ..خليه يشوف الصور واسأليه ؟؟ايه ده ؟؟(بنبرة ماما ساميه وماما نجوى )
مهارات تانيه بيعملها بسهولة :
الطفل فى السن ده المفروض يكون بيعرف يعمل اشكال كتيرة بالمكعبات وممكن يكون استخدم مكعبات اصغر من سن 3 سنوات
وبيكون قادر يميز الألوان كلها من 3 سنوات وبيكون عارف الأشكال الهندسية (المربع والدايرة والمثلث والمستطيل)
بحكم إنك علمتيه كل ده ..وبيكون حافظ اناشيد بسيطة وقرآن كمان .
طبعا قدرات كل طفل بتختلف عن التانى ..
يعنى ممكن يكون فى طفل سريع الحفظ والبديهه .. وده ممكن تحفظيه كتير .
وممكن يكون فى طفل عملى جدا ،، بيفك ويركب كتير وبيرسم ويستخدم القلم أكتر من الحفظ ..
وده ممكن تجيبي له الألوان المائيه والعاب النجار والحداد ..وتشترى العاب قابله للفك والتركيب على طول
أو العاب ماتكنش غاليه عشان يكسرها ويبتكر تانى ويركب القديمه مع الجديدة والعكس .
بس كده السن ده ممكن لحد سن 6 سنوات كمان بيكون فى استقرار سلوكى بعمل الجداول والتشجيع وعقله وإدراكه بيكون
اوسع واسهل للتعامل معاه .
سن ال6 سنوات ..يكون متعب مع بعض الناس .
لأنه بيدخل المدرسة .
وغالبا الأم بتكون غيرت له المدرسة ، أو المرحلة الإبتدائيه بأه فيها اصحاب تانين خالص.
وكتير اوى الطفل بيعمل مشاكل لو حد أخد حاجته مثلا ..لأنه بيحس إن لازم تحترموا ذاتى .
دورك تحترميه وتستأذنيه لو عوزتى حاجه منه .
كمان الطفل بيحتك بأطفال تانين .
واحيانا الأم تشتكى من سلوكيات غريبه على شخصية ابنها وتقول :
ليه اتحول واتغير كده ؟دايخة
ولأنك أم مثاليه جدا وربتيه بمثاليه جدا ، بيكون مؤدب طول الوقت جوا البيت ولما بيطلع للمدرسة ممكن اوى
يحتك بطفل تانى يحاول إحباط ابنك او قهره مثلا بطريقه ما .
يعنى مثلا ابنك جه يقعد على الديسك بكل هدوء .. لقى ولد تانى بيزأ فيه ويقومه غاص بعنه .
ممكن يكون اشتكى للميس والميس كانت سلبيه .
وبالتالى مشاعر القهر دى بقيت جواه . جه من المدرسة وممكن يكون الموقف عدى خلاص ونسي .
بس بطريقه غير مقصودة بيلاقى نفسه بيعمل مع اخوه اللى بيتعمل معاه .
وقتها انتى كأم مش عارفه ايه اللى حصل فى المدرسة ولا قعدتى معاه ؟؟؟بليز سيبوني دلوقتي
وممكن تعاقبيه على سلوكه ده وتقهريه اكترغضبانة جدا ، لأن زميله فى المدرسة ماتعاقبش زيه كمان .
وبالتالى بتزودى من سلوكه العدوانى اللى ظهر بس بعد ما دخل المدرسة .
وبتبدأ الفجوة بينك وبين طفلك تزيد ..
الحــــــــــــــــل ايه ودورك ايه ؟؟
لما ابنك يطرأ عليه أى تغير من أى نوع ، كفايه بس نظرة لوم وعتاب ..وقولى : ليه كده ؟؟
لما تفضى انتى ،و يكون هو رايق شوية ، اقعدى معاه من غير ما تفكريه بأى خطأ من أخطاؤه .
اسأليه : ها يا حبيبى ..وقفت فى الطابور النهاردة فى أى مكان ..الأول ولا ورا ..(طبعا السؤال بالنسبة لك مش مهم اوى ، بس انتى بتفكريه
بكل الأحداث اللى حصلت فى الوقت ده ، يقوم يحكى لك على موقف ضايقه جدا من صاحبه مثلا )
اسأله طب الحصه الأول كان عندك ايه ؟؟ اخدتوا العاب النهاردة ولا لاء ؟؟
اتعرفت على مين من صحابك ..؟؟ يا ترى عملت ايه النهاردة مع مدرس الحساب ..
اسأليه بطريقه صداقه ( مش سين وجيم ) خرجي منه كل المواقف السلبيه ..ولو حكى لك عن موقف زميله مثلا اللى قهره
، قولى: آآآآآه عشان كده انت عملت كده مع اخوك من غير ما تحس ..
حسيسيه إنك متضايقه عشانه ، وإنك هاتفكرى معاه ازاى تحلى مشكلته مع زميله ده .
وفهميه ، إن مش أى حد يتعامل معانا بطريقه غير لائقه نقلده وخلاص ..
فهميه إنه ممكن يكون بيعمل ده من غير ما يحس إنه غلط ..وانتى مسمحاه وهاتروحى معاه تانى لو الولد ده كرر نفس السلوك معاك
او المدرس ماخدش موقف منه .
يعنى انتى بتحاولى تخلى ابنك مسؤول عن نفسه ويحل مشكلته الأول قبل ما تروحى .
باختصار:
مهم اوى نتكلم مع ولادنا بعد المدرسة ونخرج منهم مشاعرهم السلبيه وما نقولش الجمله التقليديه : عملت ايه فى المدرسة النهارة؟
لأنها ما بتفكروش باى موقف حصله .
الرئيسية
