حكايات من الغابة

كان يا ما كا ن فى زمان غير الزمان ومكان غير المكان
المكان كان غابة بعيدة مفيهاش انسان يحكمها ملك عقله كبير وتفكيره سليم
حاكمها ملك الغابة اسد الأسود
وف كل يوم يسمع مشاكل وهموم من اول ما يصحى من النوم لحد ما يروح فى النوم ....والنهاردة المشكلة تبان انها تافهة لكنها تحير ..وبعد ما قعد الملك على عرشه نده الهدهد من فرشه واتكلم بشويش وقاله دخلى اصحاب المشكلة
نده الهدهد بأعلى صوت دخلوا التعلب دقدوق والأرنب فتفوت
الأرنب - السلام على ملك الغابة
-وعليكم السلام يا فتفوت...خير
- يا ملك الغابة انت عارف انى دغرى ومكدبش....وتعرف انى كمان مبظلمش
- تمام يا فتفوت ..كلامك مظبوط
- انا فى الحقيقة متأذى واللى اذانى هو التعلب دقدوق بيوقعنى فى جيرانى لما خلانى مخنوق
-احكيلى الحكاية من البداية للنهاية
- ليا جار بحبه وبحترمه وطول عمرنا كويسين وعمرنا ما كنا من بعض زعلانين
كل يوم نروح الغيط سوا نزرع الأرض ونرعاها والمحصول بالنص...وماشيين على كدا بقالنا سنين انا وجارى تحسين
لكن فجأة لقيته اتغير واصبح مش عاجبه التقسيم ولما سألته عن سر التغيير ..قالى انه فيه شهود علية انى بسرق من الخزين وانت عارفنى يا ملك الغابة طول عمرى ارنب امين ويعلم الله انى مش حرامى ولا خاين للأمانة وعمرى ما امد ايدى لو قدامى ملايين
- طيب ومين هو الشاهد اللى شهد بالكذب للأرنب تحسين
- التعلب دقدوق المكار
بص الأسد بأستغراب
- انت تانى يا دقدوق دى مش اول شكوى منك اشكولى سكان الغابة من العيبك وعمايلك لكن كدا انت زايد عن حدك وان الأوان
انى احكم بشأنك ..وانا دلوقتى أأمر بسجنك لحد متحقق من كذبك
- انا مظلوم صدقنى يا ملك الغابة ..دا الأرنب تحسين هو اللى قالى انه شاكك فى الأرنب فتفوت علشان الزرع بيفيض منه وهو يا دوب بيقضيه
- دلوقى هنتحقق م الكلام ...نادى ع الأرنب تحسين قوام
الأرنب تحسين يتفضل قدام عالى المقام
- السلام على ملك الغابة الهمام
- وعليكم السلام...ارنب تحسين ..انت وفتفقوت شركا بقالكم سنين وانتوا الأثنين امنا ء وعمركم ما كنتم خاينين
-تمام يا ملك الغابة
- انا عايز اسمع منك الحكاية
- الحكاية تمام زى ما قلت....ولكن فى يوم جانى التعلب دقدوق وقالى
انت مش ملاحظ ان خزينك يدوب بيقضيك وخزين فتفوت منه بيفيض...قلتلوا ارزاق ...قلى لا دى مش ارزاق دا سؤ اخلاق
واخدنى ورا بيت فتفوت وفحت فحت صغنتوت ولقيت جزر كتير محطوط فعرفت انه كلامه مظبوط
-مخزن صغنتوت الكلام دا مظبوط يا فتفوت
- باستغراب ..لا والله يا ملك الغابة انا مخزنى جوا بيتى ايه يخلينى اعمل مخزن وراه مانا لو سرقت احطه على المحصول اللى فى بيتى على الأقل اسمه زرعى ومن غيطى اكيد دى لعبة من الاعيب دقدوق المكار
الهدهد----اسمح لى يا ملك الغابة البومة هندومة واقفة ع البوابة بتقول عايزة تقول شهادة حق
- خليها تدخل قوام يا هدهود
السلام على ملك الغابة
وعليكم السلام يا هندومة ...سمعت ان عندك شهادة حق مكتومة
- ايوة فعلا يا ملك الغابة وبقالى ساعة واقفة ع البوابة
-اتفضلى قولى ...
- انا من يومين وانا طايرة بالليل لمحت التعلب دقدوق بيفحت ورا بيت الأرنب فتفوت وبعدين نط من فوق سور بيت الأرنب تحسين
استنيت فوق بيت فتفوت اشوف ايه اللى بيعمله دقدوق ولقيته جاى وشايل حمل جزر كبير وحطه فى الحفرة وردم عليهم وانا استغربت للى حصل ولما عرفت القضية قلت اكيد معلوماتى لها اهمية والله على ما اقول شهيد
- جزاكى الله كل خير يا هندومة انت فعلا ظهرتى الحقيقة
-فعلا يا ملك الغابة هندومة عندها حق فتفوت فعلا مظلوم
-ايه اللى خلاك واثق كدا يا تحسين
انا بخزن الجزر من غير اوراق عكس فتفوت والجزر اللى شفته ورا بيت فتفوت كان من غير اوراق يبقى صدقت هندومة
-دا غير ان فيه معلومة
-ايه هى يا فتفوت
- الجزر عندى عمره ميخسر لأنى بخزنه بورقه ويمكن دا اللى بيخليه يفيض عن حاجتى
-عندك حق يا فتفوت ...وانا اسف انى أسئت الظن فيك وارجوا انك تسامحنى دقدوق كان زى الشيطان بيزن على الودان وقام تحسين وباس فتفوت من راسه وقاله اقبل اسفى ارجوك
- مفيش بينا اعتذار احنا اخوات قبل ما نبقى جيران
- انا سعيد بالحب والوفاء اللى بينكم دا يا تحسين
اما الحكم حكمنا على التعلب دقدوق بالسجن 3 سنين فى زنزانة وحيد وحزين ودا لأن الفتنة اشد من القتل
واللى جرى منه مكنش يصح
وبكى التعلب دقدوق بشدة وقال حرمت يا ملك الغابة سامحنى يا فتفوت ..سامحنى يا تحسين
ربنا يسمحك واديك هتاخد جزاءك
ورجع فتفوت وتحسين يزرعوا الأرض وهما سعداء وفرحنين
وبيدعوا ربنا يبعد عنهم الشياطين والمكارين وتصبحوا على خير يا حلويين

» فكرة حكايات بنات

سجل فى : 03/05/2011

تسلم حكاويكي يا بحر الحنين

ويا رب يسعدك قولي آمين

حكايات من الغابة

مواضيع مماثلة

مواضيع مماثلة

ردود موضوع : حكايات من الغابة

حكايات من الغابة