شوفوا باعمل ايه بالفينو البايت

أكيد كلنا بيفيض عندنا فينو أنا بقى أوقات بيفيض عندي الفينو بكميات كبيرة و السبب ان ساعات جوزي ما يكونش ليه نفس للعشا (عشان ما تفكروش اني مسرفة يعني و باجيب أزيد من احتياجي) . المهم احتفظي بالفينو يومين في التلاجة أو حطيه في الفريزر لحد ما يتجمع عندك كمية مناسبة

1. ممكن تطلعيه من الفريزر و يترك ليفك و يستخدم للسندوتشات
2. أفرمه في الكبة و يستخدم مثل البقسماط على البانيه أو البطاطس الكروكيه و يعطي طعم مقرمش أكتر من البقسماط العادي.(بس حطي الكمية الفايضة في الفريزر ممكن تقعد معاكي مدة طويلة)
3. يقطع شرائح شبه البيك رولز و يحمص في الفرن 3 دقائق و ضعي عليه شوية ملح و كمون أو بابريكا ودي بتكون سناك صحية و الأولاد بيحبوها
4. نقطع الفينو شرائح سميكة و بالورب جيبي فص توم متقشر وااقطعي حرفه و ادهني بيه القطع وضعي فوقها الجبنة الموزاريلا و قطع سوسيس محمرة و دخليها الفرن لحد الجبنة ما تسيح بقى عندنا خبز الثوم سوبريم
5. اخفقي بيضتين مع نصف كوب لبن و شوية فانيليا و ربع كوب سكر .قطعي الفينو أكنك حتفتحيه بس كملي للآخر و بعدين اقسمي كل جزء اتنين كده يكون عندك 4 شرائح غطسي الشرائح واحدة واحدة في خليط البيض و حمريها في طاسة بها شوية زبدة .دة بقى اسمه الفرنش توست بس على طريقتي المصرية و هو مثالي لأفطار الأولاد خصوصا اللي ما بياكلوش البيض أو اللبن.
6. دي بقى و صفتي السوبر عملتها أول مرة لأخواتي قبل الجواز اللي يقول دي مكرونة بالبشاميل و اللي يقول لأ دي باف بستري و ما حدش صدق أبدا انها فينو بايت كمان ولادي حبوها قوي و الميزة بقى انك تقدري تحطي فيها كل الخضار اللي ما بيرضوش ياكلوه و كمان ممكن تستفيدي من بواقي الأكل عندك. قطعي كل رغيف 4 شرائح زي الطريقة السابقة ووزعي الشرائح في صينية مدهونة بشوية زبدة و يكون الطرف المقطوع لأسفل يعني مواجه للصينية اضربي في الخلاط 3 بيضات و كوب لبن و نصف كوب زبدة أو زيت و ملح و فلفل ضعي نصف الخليط على الطبقة الأولى من الشرائح بحيث تغطيها . جهزي الحشو أنا باستغل الكبة بصل الأول أفرمه فلفل أخضر جزر كوسة كله يتفرم و يتشوح على النار و أي حاجة بقى في التلاجة حتة فراخ مغضوب عليها أفصصها و أفرمها في الكبة و تتشوح ,قطعتين سوسيس ,لحمة مفرومة ......بعدين تحطي الحشو على الشرائح و تغطيه بطبقة من الشرائح بس المرة دي الطرف المقطوع يكون للأعلى و بعدين تسقيها بباقي خليط البض و اللبن و سيبيها تتشرب شوية و دخليها الفرن لحد ما يحمر وشها.

نفس الطريقة السابقة بس نعمل منها صنف حلو الحشو ممكن يكون موز أو كمبوت تفاح أو أي فواكه طرية وأضيفي نصف كوب سكر مع اللبن و البيض.
على فكرة كل الوصفات دي لازم نستخدم فيها الفينو البايت لأن الطازج مش حيدينا نفس النتيجة.
ايه رأيكم؟ جربوا و قولوا لي .

» افكار للفينوا البايت او الفايض
» شوفوا تورتتى .............
» شوفوا العلبه دى من ايه
» شوفوا الدواسه دى من ايه
» شوفوا شجر الخرز بتاعى

سجل فى : 29/04/2011

تسلمى
ربنا باركلك
افكار رائعه

سجل فى : 03/05/2011

ربنا يكرمك يا رب على الأفكار الحلوة

وتسلمي يا سكرة على الوصفات

شوفوا باعمل ايه بالفينو البايت 1040451127

سجل فى : 27/05/2011

تسلم الايادى يا قمر
انا باعمل معظم الوصفات دى بس جديدة عليا الوصفة الاخيرة
وكمان ماكنتش اعرف ان الفرنش توست ينفع يتعمل بالفينو
والله انت عسسسسسسسسسسسسل
تسلم الايادى ياقمر

سجل فى : 28/09/2011

افكار حلوة اوي
تسلم الايادي يا سكرة

سجل فى : 24/02/2012

اهى دى الافكار

تسلمى يا قمر

سجل فى : 19/11/2011

شكراااااااااااااااااا

شوفوا باعمل ايه بالفينو البايت

مواضيع مماثلة

مواضيع مماثلة

ردود موضوع : شوفوا باعمل ايه بالفينو البايت

شوفوا باعمل ايه بالفينو البايت