خلى ثلاجتك تبين شطارتك خشى بسررررررررررررررررعة

:السلام عليكم:

هنتكلم مع بعض في موضوع مهم جداً وهو إزاي نرتب الأكل ده في الثلاجة والفريزر، بحيث يكون سهل علينا استخدامه وما نحسش إننا تايهين في وسط الحاجات الكتير اللي إحنا شايلينها في الثلاجة...

وبالتالي ممكن الوقت يضيع وإحنا بندوّر على الحاجة اللي إحنا عايزين نعملها...

بس قبل ما نعرف إزاي نرتّب الأكل في الثلاجة، تعالي الأول نعرف إزاي ننظّف الثلاجة ونخلّيها زي الفل قبل ما نحفظ فيها الأكل..

نظافة ثلاجتك صحة ليكِ ولأسرتك

نظافة الثلاجة شيء ضروري جداً وصحي جداً لأنه بيساعد على الحفاظ على الأكل فيها لفترة طويلة من غير ما طعمه يتغير أو يتلف، وعلشان كده لازم نهتم بتنظيفها على الأقل مرة كل شهر…

ودي الخطوات الصحيحة اللي المفروض إنك تعمليها وإنتي بتنظّفي ثلاجتك، علشان تكوني مطمئنة إنها هتوفر جو آمن لأكلك وهتحافظ على طعمه لفترة طويلة..

اعملي جرد لثلاجتك

قبل ما تبدئي تنظّفي ثلاجتك لازم تعملي لها جرد؛ بمعنى إنك تبصي في ثلاجتك وتشوفي إيه اللي إنتي محتاجاه وإيه اللي المفروض إنك تتخلصي منه زي بواقي الأكل والحاجات اللي تاريخ صلاحيتها انتهى.

ويا ريت لو تعملي الموضوع ده مرة كل أسبوع عشان تعرفي إيه اللي عندك وإيه اللي إنتي محتاجة إنك تشتريه من السوق علشان ما تشتريش حاجة متكررة تكون موجودة عندك من قبل كده، وبكده هتهدري كمية كبيرة من الأكل.

خرّجي كل حاجة في الثلاجة

خرّجي كل الأكل اللي موجود في الثلاجة والفريزر، ولو خايفة على الأكل إنه يبوظ من الحر أو يسيح، ممكن تحطي أكياس الأكل المحفوظ في طبق مليان بالثلج.

بعد كده خرّجي الأرفف والأدراج وحوامل البيض الموجودة في الثلاجة واغسليهم كويس بالمية والصابون، وبعد كده نشّفيهم كويس بفوطة ناشفة.

نظفي الثلاجة من جوه

بعد ما عملتِ الخطوات اللي فاتت، وبقت الثلاجة فاضية خالص، هاتي فوطة وحطيها في جردل فيه مية دافية وأي صابون منظف، وامسحي الثلاجة والفريزر بالفوطة دي، وخلي بالك إنك تركزي على جوانب الثلاجة وأماكن الأدراج لأن دي الأماكن اللي بتترسب فيها فضلات الأكل، وأي مواد سايلة بتنزل في الثلاجة.

وممكن إنك تستخدمي فرشة أسنان قديمة علشان تنظّفي الأماكن الصعبة اللي مش هتعرفي توصلي لها بإيدك، ويفضّل إنك تنظفي الثلاجة من فوق لتحت.

تخلصي من البقع الصعبة

لو كانت فيه بقع مش قادرة تتخلصي منها بسهولة ممكن تدوّبي شوية بيكنج باودر في مية دافية وحطّي الخليط ده على البقع الصعبة، وبعد كده امسحي مكان البقع بفوطة مبلولة بمية دافية وهتلاقي البقع اتمسحت بسهولة جداً.

أما بقى بُقع السمنة والشحوم اللي بتكون موجودة في الثلاجة والفريزر فدي ممكن تتخلصي منها بإنك تمسحي مكانها بفوطة عليها كمية من الخل الأبيض أو السبرتو، وهتلاقي الثلاجة رجعت كأنها جديدة بالظبط.

تخلّصي من الثلج في الفريزر

لو الفريزر بتاعك فيه ثلج ممكن تحطي فيه طبق مليان مية سخنة وتقفلي الفريزر، وبعد 10 دقايق تفتحيه وابدئي امسحي الثلج بفوطة جافة، وممكن بعد كده تحطّي طبقة من الجلسرين في الفريزر علشان تمنع إن الأكل اللي هتحطيه في الفريزر يلتصق به.

نظّفي باب الثلاجة

امسحي باب الثلاجة بفوطة مبلولة بمية وخلّ
ناس كتير لما بتيجي تنظّف الثلاجة بتنسى إنها تمسح الجزء المطاطي اللي بيكون موجود في باب الثلاجة أو الفريزر من جوّه؛ لكن لو دققتِ كويس في المكان ده، هتلاقي إنه مش نظيف خالص، علشان كده مش لازم تنسيه وإنتِ بتنظّفي ثلاجتك، وكل اللي عليكِ إنك تمسحيه بفوطة مبلولة وعليها كمية كبيرة من الصابون، وبعد كده امسحيه مرة كمان بفوطة مبلولة بمية وخلّ، وبعدين نشّفيه بفوطة ناشفة.

حطي كل حاجة في مكانها

بعد ما عملتِ الخطوات اللي فاتت دي، رجّعي كل الأرفف والأدراج في الثلاجة، وبعد كده هاتي فوطة مبلولة وامسحي بها الثلاجة من بره ومن الجوانب.

احتفظي بريحة النظافة في ثلاجتك

علشان ثلاجتك تفضل ريحتها نظيفة ومُنعشة، ممكن بعد ما تنظّفيها تحطي قطعة من الفحم أو برطمان فيه شوية مية وخلّ في الثلاجة لأن الخل والفحم بيساعدوا على امتصاص الروايح، وبيحافظ على الأكل من إنه يلقط الروايح دي.

وممكن تستعملي قشر الليمون أو البرتقال وتحطيهم في طبق في الثلاجة عشان تخلّي ريحتها حلوة ومنعشة على طول.

العلب البلاستيك

بتوفر مساحة كبيرة في الثلاجةترتيب الثلاجة فن وتخطيط
بعد ما عرفنا إزاي ننظف الثلاجة كويس، بطريقة مرتبة ومريحة جداً ومش هتاخد مننا وقت كتير، لازم كمان نعرف إن ترتيب وتوزيع الأكل جوه الثلاجة لازم يتم بتخطيط وتكنيك معين، علشان تبقى ثلاجتك فعلاً بتبيّن شطارتك، وأي حد يشوفها يعرف إنك ست بيت شاطرة.

ودلوقتي تعالي نتعرف على فن ترتيب الثلاجة...

العلب البلاستيك شياكة وتنظيم

العلب البلاستيك اللي بتستخدم لحفظ الطعام في الثلاجة، من أكتر الحاجات اللي بتساعد على إن ثلاجتك تكون شكلها مرتّب ومنسق، وكمان بتحافظ على ريحة الثلاجة حلوة لإنك بتحطي الأكل فيها وبتغطّيها بغطاء محكم مش بيخلي روايح الأكل الموجود في الثلاجة تدخل مع بعضها، وكمان بتوفر مساحة كبيرة في الثلاجة لأن بيكون لها شكل منتظم، سواء كان مربع أو مستطيل، فتقدري تحطي أكتر من علبة فوق بعض وجنب بعض، أما الأكياس البلاستيك والحلل بتاخد مساحة كبيرة في الثلاجة ومش بتخلي شكلها حلو.

اعملي قاعدة بيانات للأكل المحفوظ

هتقولي لي يعني إيه قاعدة بيانات، هاقول لك يعني كل حاجة بتحفظيها في الفريزر سواء خضار أو فاكهة أو عصير أو لحمة أو سمك، لازم تلزقي عليه ورقة تكوني كاتبة عليها اسم الحاجة اللي في الكيس أو في العلبة؛ وده لأن الأكل بعد ما بيتجمد ممكن ما تقدريش تميّزي شكله، وكمان يُفضل إنك تكتبي على الورقة دي التاريخ اللي حفظتيه فيها، وده علشان تقدري تعرفي بعد كده إذا كانت الحاجة اللي إنتِ حافظاها دي لسه صالحة للاستخدام ولا لأ؛ لأن كل حاجة بتحفظيها بيكون لها مدة معينة تكون صالحة فيها للحفظ ولو قعدت بعد المدة دي بيكون من الأفضل إنك ما تستخدميهاش.

والجدول ده هيعرفنا المدة اللي ممكن نحفظ بها أنواع الأكل المختلفة، لو كان الفريزر عندك تبريده كويس...

اللحوم الطازة

بتحتفظ بطعمها في الفريزر لمدة من 6 إلى 9 شهور

اللحمة المفرومة

بتحتفظ بطعمها في الفريزر لمدة 3 شهور

اللحوم المطبوخة

بتحتفظ بطعمها في الفريزر لمدة من 2 إلى 3 شهور

الفراخ الطازة

الفراخ الصحيحة بتحتفظ بطعمها لمدة سنة، أما الفراخ المقطعة بتحتفظ بطعمها لمدة 9 شهور

الفراخ المطبوخة

بتحتفظ بطعمها لمدة 3 شهور

الشوربات والصلصة

بتحتفظ بطعمها لمدة 3 شهور

الفاكهة المحفوظة

المضاف لها سكر أثناء الحفظ بتستمر لمدة 12 شهر في الفريزر، وممكن نحتفظ بها لمدة 6 شهور لو مش مضاف لها سكر

وطبعاً يُفضل إن الأكل القديم عندك تحطّيه في مكان واضح علشان تستخدميه بسرعة قبل ما مدة صلاحيته تخلص.

حطي الأصناف المتشابهة مع بعض

راعي وإنتِ بترتّبي الأكل في الثلاجة أو الفريزر إنك تحطّي الأكل اللي شبه بعضه في نفس المكان؛ يعني تحطي اللحوم مع بعضها، والخضروات مع بعض والفاكهة مع بعض والعصاير مع بعض.

وبكده ثلاجتك هيبقى شكلها مرتّب ومنسّق، وكمان هتقدري تلاقي الحاجة اللي إنتي محتاجاها بسرعة وبسهولة.

انا بعمل كدا وبجد بكون مرتاحة جدا وكل حاجة بتكون سهلة عليا يارب تنفعكم ومتكسلوش
يا رب الموضوع يكون عجبكم ونفيد ونستفيد كلنا محرجة

» صيانة زانوسي (01154008110 ثلاجتك بأمان(0235710008) اصلاح غسالات زانوسي
» صيانة طومسون (01154008110 ثلاجتك بأمان(0235710008) اصلاح غسالات طومسون
» صيانة سامسونج (01154008110 ثلاجتك بأمان(0235710008) اصلاح دراير سامسونج
» توكيل طومسون (01154008110 ثلاجتك بأمان(0235710008) اصلاح غسالات طومسون
» توكيل سامسونج (01154008110 ثلاجتك بأمان(0235710008) اصلاح دراير سامسونج

سجل فى : 13/06/2011

بجد فكرة حلوة اوى اوى
انا بردة بعمل كدا بس مش دائما لما اكون عندى وقت
خلى ثلاجتك تبين شطارتك خشى بسررررررررررررررررعة 1040451127

خلى ثلاجتك تبين شطارتك خشى بسررررررررررررررررعة

مواضيع مماثلة

مواضيع مماثلة

ردود موضوع : خلى ثلاجتك تبين شطارتك خشى بسررررررررررررررررعة

خلى ثلاجتك تبين شطارتك خشى بسررررررررررررررررعة